Lauf-Alter-lauf! oder: die Suche nach Glückseligkeit

Noch gude 6 Monad bis zum HM Berlin 2025.

Es laaft jezd schun mol wieder äh bissl besser. Awwer isch glab die alde Zeide wär isch nimme erreische.

Wenn isch ma so mol ohguck was isch so laaf muss isch ma gonz ehrlisch äugstehe, dass isch diesmol 2.Stunde un 40 Minute brauche wär.

Alla hopp, dann is es halt so. Moi Problem is immer noch, dass isch am Ofang zu schnell bin, un hinne naus werd isch immer longsamer…..

Frieher hab isch als noch so Tempoverschärfungen gemacht. Irgendwie geht es jezd nimmer; des is ma zu viel.

Isch laaf jo fast nur noch im Wald. Un wenn isch des Johr so revue passiere loss wars immer matschisch. Pfütze ohne end, Überschwemmung un monchmol hod ma gemähnt ma laaft im Dschungel, so feischt wars allemol.

Isch bin ah nochmol uff Radtour gonge. Diesmol bin isch in Neustadt/Weinstr. gestartet un bin bis nach Luxemburg kumme, in 4 Tag. Donn noch bis Trier un vunn dort zurick, weils widder zu regne ogfange hod. Insgsamt  383 km. Awwer ohne E-Bike hed isch des nimme gschafft. Un Gepäck absolutes Minimum. Isch übernacht in Hotels, Pensione oder JUHE. Des mid dem Zelt wie frieher geht ah nimmi. Die alde Knoche, un vorallem moim Kreiz muss isch Tribut zolle.

Isch wes jo ned ob ihr die Marathonrenne verfolgt. Mir is ufgfalle, dass sisch bei de Deitsche Läufer viel gedah hod. Is frieher mol ähner um die 2:10 Std. gerennt, sinn des jezd so fünfe die weit drunner laafe. Des is de Wohnsinn.

Euer Marathon-Heuner

Isch habs gemachd !

Allah gud, isch hab misch far de Halbmarathon Berlin 2025 ohgemeld.

Isch hab noch gonz zittrische Händ. Gonz geheuerlisch is mas awwer donn doch ned un isch hab gleich noch äh Rücktrittsversicherung mit abgschlosse.

Monn, oh monn, isch bin donn 72 Johr ald un moin ledschder  HM liegd ah schunn zweh johr zurick.

Awwer ehrlisch, isch will`s hald noch ähmol wisse, un Berlin iss hald klasse, ah weil die des Brandeburger Tor zum Zieleulauf 3:15 Stunde offe halde. Des schaff isch, un bei denne fast 40.000 wär isch ah ned ledschder.

Seid März lafft`s ah gonz gud un isch bin regelmäßig unnerwegs. Isch hab ma jedzd so ähn 3 Tag-Rhythmus ahgwöhnt, un laafe du isch fascht nur noch frieh morgens un im Wald. Gonz ehrlisch, isch fahr do jedzd ofd midm Auto hie. Bommel un Reschpekt hab isch vor dem hadde Asphalt, denn nur uff de Stroß zu laafe is schunn ah grassi Nummer.

Isch hab jezd ah äh running-app. Unn isch laaf jezd nimmer, sondern isch bin beim work-out.

De summer iwwer war isch viel unerwegs mid moim E-Bike. An der Nordsee un isch bin bis Schleswig hochkumme. Donn nonmol äh Woch im Saarland, un donn  Holland awwer ohne Rad. Isch bin jezd noch fit un des nitz isch aus. Was wes donn isch was in 2 oder drei Johr iss.

Moin Stammdisch. Isch war de Summer iwwer bloß ah paar mol do. Awwer immer des gleische gejammer un gezeter. Ned das ihr mend isch sei hardherzig, nur wenn se bloss noch iwwer ihre Kronkheide un Wehwehsche lamendiere geht ma des uff die Hutschnurr. Neilisch hab isch gemähnt, ihr sollt halt weniger saufe, do hawwe se misch bläd ausgelacht.

Die hawwe nix mehr vor un wenn isch mol män ma kennde doch mol widder in die Palz niwwer fahre un wanere, gucke die misch oh, als ob isch ähn Alien oder äh Zombie wär. Monschmol kumm isch schwer ins grüble. Was wär gewese, wenn isch ned vor 7 Johr widder mit dem Laafe ohgfange häd. Isch drink immer noch Bier, alkoholfreies Weizebier un ab un zu Rose, awwer so brutale abstärze wie frieher als, hab isch nimmi.

Euer Marathon-Heuner

De Marathon-Heuner im Oktober 2023

Kläne Brätscher backe!

Isch hab eisch jo gsagt, dass isch eisch uff dem laufende halde wär.

Allah gud.

Mit moine Vorsorgeunersuchunge bin isch dursch. Irgendwas an moiner Schildrüse iss net gonz in ordnung un jedzd muss isch im Januar nochmal hi un die dun dann gucke ob sisch was veränert hot. Un bis dohi muss isch jeden morge 1 Tablett schlucke. Des is mol was ganz neies far misch, denn bis uff äh paar Schmerztablette, meischtens wenn isch zuviel gsoffe hab, hab isch bisher nie Tablette fresse misse. Awwer  moi Laferei mach isch weider.

Wie schun gsacht. Die Zeide die isch mol geloffe bin konn isch abhoge. Schlussaus, vorbei, finito. Äh Streck, die isch immer mol wieder laf is 7,5 km long. Die bin isch vor 4 Johr um die 45 Minute geloffe. Grad geschtern hab isch`s endlisch gschafft unner 50 Minute zu kumme. Awwer frogt ned, wie ma do die Kuddel rauskonge iss.

Isch hab jedzd ah widder ogfange längere Strecke zu laafe, un uff Aspalt. Dodefier hab isch ma neie Schuh gekaft, die ohgeblisch moi Gewischt besser abfedere und die Knoche schone. Bis jedzd hab isch ned viel gemerkt.

Am liebschte laaf isch am Sunntag. Morgens in aller frieh. Do iss kän Schwanz uff de Gass un isch renn so quer dursch die Stadt. Wenn donn moi App sacht, Heuner du hoscht 5 km geloffe, denk isch ans umkehre. Des iss wie sightseeing, un es kummt ma als so vor als ob die Stadt nur mir gehöre würd. .

Fär Berlin 2024 hab isch misch noch ned ahgemeld. Irgendwie trau isch misch noch ned. Isch bin zum Franklinlauf zum zugugge gange. Ähfach mol wieder Wettkampfluft schnuppere.  Ok, isch wollt ah mol gugge wo isch  lande det. In moiner Altersklass – Ü 70 wär isch 2. awwer ah letschder worre. Isch un moi ego, mir misse jedzd dro arweide, dass ma ah wenn ma ledschder wärd, dann stolz soi konn.

Awwer jedzd ahmol was ernschtes. Mid moim 70. Gebordsdag hods ogfange, dass isch iwwer de Tod nochgedacht hab. Sterbe des war sowas fär alde Leid odder des wo weit weg von mir liegt. Awwer dann korz hinernanner drei Todesfäll, die misch berührt hawwe, un zwä dofu in moim alder un vunn unserer frihere Clique. Donn de nächschte Hammer. Zwä vum Stammdisch. Ähner hod Krebs kriegt, gonz plötzlisch, un de onner hods uff ahmol am Herz. Mir ware alle gschockt. Wenn ma so äh Krebstharapie mid der Chemo un denne Bestrahlunge mohl so Hautnah miterlebt, so vunn Woch zu Woch, des geht ähm gonz schäh an die Niere. Corona überstanne, un donn sowas.

Mir iss klar worre, dass misch so ähn scheiss ah erwische kennt, un isch noch 10 hächstensch 15 Johr hab. Isch sag ma jedzd öfters: Heuner machs Beschde draus.

Euer Marathon-Heuner

De Marathon-Heuner im September 2023

Nochmol dursch startä oder ma fahre uff Berlin

Ma glabts jo ned. Awwer es iss tatsächlisch mehr als 4 Johr her, dass isch im Friehjohr 2019 moin erschte HM geloffe bin.

Isch wills nochmol wisse un nochmol in Berlin laafe. Ma merkts halt doch, dass die alde Knoche nimmer so rescht wolle. Isch will es jedzd nochmol ohgehe, denn wer wes was noch alles kummt. Die Amis wolle jo widder wege Corona die Maskepflicht  euführe. Un mir mache de Amis jo alles noch.

Isch hab misch dursch cheke losse un bis jetzd is alles grad noch im grüne Bereich. Nächschti woch muss isch noch zum Urologe……..

So schnell wie frieher bin isch awwer wahrscheunlich nimmi. Die Berliner hawwe ä drei Stunde limit und dess is machbar.

Isch hab die ledschde zwä Johr gonz viel Rickschläg eustecke misse. Corona, Hexeschuss, äh hardneckische Zohfleisch Endzündung und im Auguscht bin isch bei ähner Radtour dursch de Pälzer Wald gestärzd un hab ma bes des linke Knie uffgschlage un mar äh ausgewachsene Rippeprellung eugfange.

Jezd muss isch gonz longsam widder ofange un alles bleiwe losse was moiner Fitness schade kennt. Des hest: Kän Alkohol mehr, kä Worscht, mehr Gemies un Obst in Menge, awwer sunscht uff Zucker verzischde.

Un nadierlisch alle 2/3  Tag ab in de Wald un Kilomeder robbe. Isch du aisch uff dem laufende halde.

Euer Marathon-Heuner