Kategorie: Blogbeiträge

Veröffentlicht am

De Marathon-Heuner im März 2025

Nur noch 2  Wochen bis zum Berlin Halbmarathon

Also die Schuh hab isch halbwegs eugeloffe. Nächschti Woch mach isch nochmol ähn längerer Lauf nur uff  Asphalt. Awwer alles in Maße.

Ledschdi Woch war isch mol bei dem Parkrun in Ma-Neckarau. Do konscht jeden Samschdag um 9.00 Uhr mit viele annere 5 km renne un kriegschd hinnerher sogar deu Ergebnis uff deu e-mail. Un alles fär umme.

Isch wes ned ob ihr ah des Problem habt. Isch geh de 1. Kilomeder bei offizielle Läuf immer zu schnell oh. Un hinnerher fehle ma donn die Reserve. Un isch bin ma immer usischer wo isch misch beim Startfeld eusortiere soll. Bin isch zu weit vorne, wär isch schtändisch iwwerholt, was jo ah ned gud  fär die Moral iss. Bin isch zu weit hinne muss isch iwwerhole, was moin Laufrythmus stärt. Do wolld isch mol widder „Wettbewerbsluft“ schnuppere, dieweil in Berlin iss des schunn arg wischtisch, dass ma gradweg un gradaus laafe konn. Wenn do im falsche Block schtehscht bischt verratzt. Die Berliner wolle ah immer vun mir moi Zielzeit wisse, bzw. isch soll in misch gehe un moi Zielzeid iwwerpriefe.

Die mache misch gonz wuschelisch. Isch bin seid Tage am rechne. Dieweil isch muss jo mid euplone, dass isch, so war des halt bisher immer, die ledschde 5 Kilomeder longsamer wär.

Bei dem Parkrun bin isch die 5 Kilomeder in 34 Minude geloffe. Des konscht nadierlich ned hochrechne. Egal. Awwer jezd uffbasse: Isch war selwer gepläddeld. In meuner Altersklass 70-75 sinn mid mir 5 geloffe,  un isch war de Schnellschde.

 

Bis bald

Euer Marathon-Heuner

 

 

Veröffentlicht am

DE Marathon-Heuner im März 2025

Nur noch 5  Wochen bis zum Berlin Halbmarathon

Also beim Gewischt hod sisch ned viel gedah. Bleibt so immer um die 81 kg.

Isch hab jezd mol ähn longe Lauf gemacht. 16 km. Isch bin unner 2 Stunne gebliebbe. Awwer isch konn eisch sage, die ledschde 2 Kilomeder ware hard. Isch bin viel dovu uff Asfahlt geloffe.  Dabei  iss ma klar worre, dass die Dämmung vunn meune Schuh nix mä iss. Isch hab ma glei neie bestellt un die muss isch erscht mol eulaafe. Awwer ihr liewe Leid, Preise sinn des inzwische fär so äh paar Schlabbe, do bleibt der die Spukke weg.

Isch hab ah gemerkt, dass isch unnerwegs mehr dringe muss. Des is verflixt. Wenn isch beim Dringe renn krieg isch nix runner. Bleib isch stehe un drink brauch isch ewisch biss isch wieder in Tritt kumm. Vielleischt macht jo Übung de Meischter.

Un des wird jo ah empfohle  so ab 10 km, noch äh Gel zu lutsche odder so ähn Riegel zu kaue. Isch wär mol alles ausprobiere un sehe was zu mir passt.

Zum Glick hab isch mar in Berlin schon vor Weihnachtä äh Unnerkunft besorgt, alldieweil jezat alles ausgebucht iss. Die iss in Pankow un die konn isch noch bis 1 Woch vorher storniere.

Es wird jo viel iwwer die Bahn gschänt. Awwer uffpasse. Isch hab afong  Februar meu Fahrt uff Berlin gebucht. Hi und zurick, mid Platzkarde 49,90 €. Do konscht doch net meckere. Oder ? Des ähnzische wo ma maule kennt iss, dass de Zug um 7.30 Uhr fährt. Awwer mol ehrlisch wer do motzt, dem konn isch ah ned Helfe.

Neilisch war isch mol widder noch longer Zeid beim Stommdisch. Her do fälld ähm uff wie ald mir alle worre sin. Grass. Awwer was supper war, käner hod iwwer meu Lafferei gehetzt oder Dumme sprich gemacht wie frieer. Ähner hod so gar gemähnt: Heuner Reschpekt, Du trauscht Dich was.

 

Bis bald

Euer Marathon-Heuner

Veröffentlicht am

De Marathon-Heuner im Februar 2025

Noch acht Wochen bis zum Berlin Halbmarathon

Isch wes ah ned ob des äh Erfolgsmeldung iss. Isch bi jezd bei 81 kg. 

Awwer vor lauder Verzweiflung weil die kilos ähfach ned runner wolle hab isch ma beim Aldi so äh Digidalwoog gekaaft. So mid Muskelmasse un Wasseranteil im Kärpper. Fär 4,99 € mid Batterie schunn drin. Wenn ma do noch die Mehrwertsteuer abzieht bleibt ähn Warewert vunn ca. 4 €. Des iss unmöglisch. Un konn eigendlisch ned seu. Oder was mähnt ihr ? China ?

Im Januar bin isch insgesamt 97 km geloffe un dovun 3 mol mehr als 12,5 km. 14,3 km war bislong des längschde.

Isch muss jezd awwer weider steigern. Isch konn misch noch gud erinnern, dass beim leschde mol so zwische dem 17. un 18. km de große Hammer bei mir kumme iss un donn hab isch misch nur noch ins Ziel gschleppt.

Un isch muss widder raus uff de Asphalt. Do hab isch bammel devor.

Jezd muss isch gonz ehrlisch zu mir seu. Isch muss meu Zielzeid korrigiere, un zwar noch owwe. 2. Stunden 40 Minute. Pu, jezd iss es raus. Awwer schneller  geht halt nimmer.

Im Januar hab isch mid Schnuppe un Huste zu kämpfe ghabt un bin jezd froh, dass isch die 7 km widder in 49 Minuten laafe konn. Awwer die konn isch hald ned durschlaafe. Uff de lezde 4 Kilomeder bin isch bisher immer longsamer worre.

Euer Mararthon-Heuner

 

Veröffentlicht am

De Marathon-Heuner im November 2024

Noch fünf Monate bis zum Berlin Halbmarathon

So ein riesen Mist. Jezd leck mich doch am A.

Isch kennt ma in de A. beiße. Was passiert is ? Des konn isch eisch sage:

Ich bin uff die Schnauz gfalle. Im Wald sinn heuer so viel Blädder, dass ma nimmi sieht was drunner iss. Isch bin iwwer äh Worzel gstolpert und hie gedorzelt. Mit dä Händ hab isch misch abfange kenne, awwer ah uffs linke Knie gedunnert. Isch bin durch die Luft wie äh Raked, un der Uffprall war in meune linke Rippe. Gebroche iss nix, awwer äh heftische Prellung. Beim schlofe konn isch nur uff ähner Seid liege un des iss mehr als Bled.

Des iss schunn komisch. An dem Morge hab isch misch ned gud gfühlt un mehrfach iwwerlegt ob isch ned Morge laafe soll. Awwer ne, isch hab moin Plan einhalten misse un jezd hab isch de Salat. 

Mol gucke wie long isch diesmol aussetze muss. Es iss awwer noch long hie un isch bleib optimistisch. Es iss  grad ziemlisch gud geloffe. Isch war ähmol 14 km unnerwegs, des war schunn vielversprechend. Un uff die kurze 5 km bin isch fascht schunn uff Vorjahresniveau. Es iss hald so, dass isch jedes Johr mehr uff moim Buckel spier wie ähn Sack Zement.

Isch wes ned wie ihr des macht, awwer isch versuch beweglisch zu bleibe und mach ah sowas wie Muskelaufbau. So mit Hanteln. Bei mir iss des eher so, dass isch ned uffbau, sondern des bissl was an Muskeln do iss versuch ich zu erhalte. Un donn mach isch morgens äh bissl Gymnastik.

Mol was gonz anneres. Wie siehdn des aus mid eurere Kilos. Also mid euerm Hüftgold.  Isch kumm nur noch sau schwer äh paar Kilo runner. Als isch wiedder intensiver gstartet bin hab isch 85 Kilo ghabt. Jezat sinns 83 Kilo. Schlappe 2 Kilo un isch guck wirklisch was isch futter un was ned. Moi Ziel bis zum HM in Berlin sinn 80 Kilo Kampfgewichd. Also drickt ma die Daume.

 

 

 

Veröffentlicht am

De Marathon-Heuner im Oktober 2024

Noch gude 6 Monad bis zum HM Berlin 2025.

Es laaft jezd schun mol wieder äh bissl besser. Awwer isch glab die alde Zeide wär isch nimme erreische.

Wenn isch ma so mol ohguck was isch so laaf muss isch ma gonz ehrlisch äugstehe, dass isch diesmol 2.Stunde un 40 Minute brauche wär.

Alla hopp, dann is es halt so. Moi Problem is immer noch, dass isch am Ofang zu schnell bin, un hinne naus werd isch immer longsamer…..

Frieher hab isch als noch so Tempoverschärfungen gemacht. Irgendwie geht es jezd nimmer; des is ma zu viel.

Isch laaf jo fast nur noch im Wald. Un wenn isch des Johr so revue passiere loss wars immer matschisch. Pfütze ohne end, Überschwemmung un monchmol hod ma gemähnt ma laaft im Dschungel, so feischt wars allemol.

Isch bin ah nochmol uff Radtour gonge. Diesmol bin isch in Neustadt/Weinstr. gestartet un bin bis nach Luxemburg kumme, in 4 Tag. Donn noch bis Trier un vunn dort zurick, weils widder zu regne ogfange hod. Insgsamt  383 km. Awwer ohne E-Bike hed isch des nimme gschafft. Un Gepäck absolutes Minimum. Isch übernacht in Hotels, Pensione oder JUHE. Des mid dem Zelt wie frieher geht ah nimmi. Die alde Knoche, un vorallem moim Kreiz muss isch Tribut zolle.

Isch wes jo ned ob ihr die Marathonrenne verfolgt. Mir is ufgfalle, dass sisch bei de Deitsche Läufer viel gedah hod. Is frieher mol ähner um die 2:10 Std. gerennt, sinn des jezd so fünfe die weit drunner laafe. Des is de Wohnsinn.

 

Euer Marathon-Heuner

Veröffentlicht am

De Marathon-Heuner im September 2024

Isch habs gemachd !

Allah gud, isch hab misch far de Halbmarathon Berlin 2025 ohgemeld.

Isch hab noch gonz zittrische Händ. Gonz geheuerlisch is mas awwer donn doch ned un isch hab gleich noch äh Rücktrittsversicherung mit abgschlosse.

Monn, oh monn, isch bin donn 72 Johr ald un moin ledschder  HM liegd ah schunn zweh johr zurick.

Awwer ehrlisch, isch will`s hald noch ähmol wisse, un Berlin iss hald klasse, ah weil die des Brandeburger Tor zum Zieleulauf 3:15 Stunde offe halde. Des schaff isch, un bei denne fast 40.000 wär isch ah ned ledschder.

Seid März lafft`s ah gonz gud un isch bin regelmäßig unnerwegs. Isch hab ma jedzd so ähn 3 Tag-Rhythmus ahgwöhnt, un laafe du isch fascht nur noch frieh morgens un im Wald. Gonz ehrlisch, isch fahr do jedzd ofd midm Auto hie. Bommel un Reschpekt hab isch vor dem hadde Asphalt, denn nur uff de Stroß zu laafe is schunn ah grassi Nummer.

Isch hab jezd ah äh running-app. Unn isch laaf jezd nimmer, sondern isch bin beim work-out.

De summer iwwer war isch viel unerwegs mid moim E-Bike. An der Nordsee un isch bin bis Schleswig hochkumme. Donn nonmol äh Woch im Saarland, un donn  Holland awwer ohne Rad. Isch bin jezd noch fit un des nitz isch aus. Was wes donn isch was in 2 oder drei Johr iss.

Moin Stammdisch. Isch war de Summer iwwer bloß ah paar mol do. Awwer immer des gleische gejammer un gezeter. Ned das ihr mend isch sei hardherzig, nur wenn se bloss noch iwwer ihre Kronkheide un Wehwehsche lamendiere geht ma des uff die Hutschnurr. Neilisch hab isch gemähnt, ihr sollt halt weniger saufe, do hawwe se misch bläd ausgelacht.

Die hawwe nix mehr vor un wenn isch mol män ma kennde doch mol widder in die Palz niwwer fahre un wanere, gucke die misch oh, als ob isch ähn Alien oder äh Zombie wär. Monschmol kumm isch schwer ins grüble. Was wär gewese, wenn isch ned vor 7 Johr widder mit dem Laafe ohgfange häd. Isch drink immer noch Bier, alkoholfreies Weizebier un ab un zu Rose, awwer so brutale abstärze wie frieher als, hab isch nimmi.

Euer Marathon-Heuner

Veröffentlicht am

De Marathon-Heuner im Oktober 2023

De Marathon-Heuner im Oktober 2023

Kläne Brätscher backe!

Isch hab eisch jo gsagt, dass isch eisch uff dem laufende halde wär.

Allah gud.

Mit moine Vorsorgeunersuchunge bin isch dursch. Irgendwas an moiner Schildrüse iss net gonz in ordnung un jedzd muss isch im Januar nochmal hi un die dun dann gucke ob sisch was veränert hot. Un bis dohi muss isch jeden morge 1 Tablett schlucke. Des is mol was ganz neies far misch, denn bis uff äh paar Schmerztablette, meischtens wenn isch zuviel gsoffe hab, hab isch bisher nie Tablette fresse misse. Awwer  moi Laferei mach isch weider.

Wie schun gsacht. Die Zeide die isch mol geloffe bin konn isch abhoge. Schlussaus, vorbei, finito. Äh Streck, die isch immer mol wieder laf is 7,5 km long. Die bin isch vor 4 Johr um die 45 Minute geloffe. Grad geschtern hab isch`s endlisch gschafft unner 50 Minute zu kumme. Awwer frogt ned, wie ma do die Kuddel rauskonge iss.

Isch hab jedzd ah widder ogfange längere Strecke zu laafe, un uff Aspalt. Dodefier hab isch ma neie Schuh gekaft, die ohgeblisch moi Gewischt besser abfedere und die Knoche schone. Bis jedzd hab isch ned viel gemerkt.

Am liebschte laaf isch am Sunntag. Morgens in aller frieh. Do iss kän Schwanz uff de Gass un isch renn so quer dursch die Stadt. Wenn donn moi App sacht, Heuner du hoscht 5 km geloffe, denk isch ans umkehre. Des iss wie sightseeing, un es kummt ma als so vor als ob die Stadt nur mir gehöre würd. .

Fär Berlin 2024 hab isch misch noch ned ahgemeld. Irgendwie trau isch misch noch ned. Isch bin zum Franklinlauf zum zugugge gange. Ähfach mol wieder Wettkampfluft schnuppere.  Ok, isch wollt ah mol gugge wo isch  lande det. In moiner Altersklass – Ü 70 wär isch 2. awwer ah letschder worre. Isch un moi ego, mir misse jedzd dro arweide, dass ma ah wenn ma ledschder wärd, dann stolz soi konn.

Awwer jedzd ahmol was ernschtes. Mid moim 70. Gebordsdag hods ogfange, dass isch iwwer de Tod nochgedacht hab. Sterbe des war sowas fär alde Leid odder des wo weit weg von mir liegt. Awwer dann korz hinernanner drei Todesfäll, die misch berührt hawwe, un zwä dofu in moim alder un vunn unserer frihere Clique. Donn de nächschte Hammer. Zwä vum Stammdisch. Ähner hod Krebs kriegt, gonz plötzlisch, un de onner hods uff ahmol am Herz. Mir ware alle gschockt. Wenn ma so äh Krebstharapie mid der Chemo un denne Bestrahlunge mohl so Hautnah miterlebt, so vunn Woch zu Woch, des geht ähm gonz schäh an die Niere. Corona überstanne, un donn sowas.

Mir iss klar worre, dass misch so ähn scheiss ah erwische kennt, un isch noch 10 hächstensch 15 Johr hab. Isch sag ma jedzd öfters: Heuner machs Beschde draus.

 

Euer Marathon-Heuner

 

 

 

Veröffentlicht am

De Marathon-Heuner im September 2023

Nochmol dursch startä oder ma fahre uff Berlin

Ma glabts jo ned. Awwer es iss tatsächlisch mehr als 4 Johr her, dass isch im Friehjohr 2019 moin erschte HM geloffe bin.

Isch wills nochmol wisse un nochmol in Berlin laafe. Ma merkts halt doch, dass die alde Knoche nimmer so rescht wolle. Isch will es jedzd nochmol ohgehe, denn wer wes was noch alles kummt. Die Amis wolle jo widder wege Corona die Maskepflicht  euführe. Un mir mache de Amis jo alles noch.

Isch hab misch dursch cheke losse un bis jetzd is alles grad noch im grüne Bereich. Nächschti woch muss isch noch zum Urologe……..

So schnell wie frieher bin isch awwer wahrscheunlich nimmi. Die Berliner hawwe ä drei Stunde limit und dess is machbar.

Isch hab die ledschde zwä Johr gonz viel Rickschläg eustecke misse. Corona, Hexeschuss, äh hardneckische Zohfleisch Endzündung und im Auguscht bin isch bei ähner Radtour dursch de Pälzer Wald gestärzd un hab ma bes des linke Knie uffgschlage un mar äh ausgewachsene Rippeprellung eugfange.

Jezd muss isch gonz longsam widder ofange un alles bleiwe losse was moiner Fitness schade kennt. Des hest: Kän Alkohol mehr, kä Worscht, mehr Gemies un Obst in Menge, awwer sunscht uff Zucker verzischde.

Un nadierlisch alle 2/3  Tag ab in de Wald un Kilomeder robbe. Isch du aisch uff dem laufende halde.

Euer Marathon-Heuner

 

 

Veröffentlicht am

Wie Phönix aus der Asche

 

Allah good, im neie Johr fong isch widder oh zu laafe.

Vunn wege! Pfeifedeckel ! Des hod äfach ned geklappt. Immer is was neies dezwische kumme un isch hab schunn gedenkt isch muss mid dem Laafe gonz uffhere.

Isch hab ma sogar beim Aldi so zwe Stecke, also zum Walken gekafft. Do sehd ihr mol wie verwzeifeld isch war.

Awwer:   alles neu macht der Mai. Isch hab widder ohgfange. Immer nur 5 Km un isch hab ma Strecke rausgsucht, do wo isch ned viel, oder gar ned uff dem bläde Asphalt laafe muss.

Es geht, mehr konn isch noch ned sage. Ziele du isch awwer noch ned ins Visier nämme.

Neulisch beim Stommdisch, als se misch uffgezoge hawwe, warum isch  ned  beim Dämmermarathon midlaafe ded, hab isch gemähnt, isch muss bis nächstesch Johr warde, denn dann bin isch Ü 7O, un du uff dem Treppsche stehe. Des hawwe se ned verstonne. Awwer egal, die schnalle so wie so nix.

Zum Beispiel mit dem Ukraine-Krieg, do hawwe se plötzlich Stress ghabt un rumgejolt, ma muss sisch Vorräte anlegen.

Sind die doch tatsächlisch in die Pfalz niwwer gfahre un hawwe sich jeder 5 Käste Woi, fär de Notfall, gholt.

Apropo Pfalz, dies Johr geht’s beim Dämmermarathon ned niwwer uff die bläd seid vum Rhoi – nach Lumpehafe.

Das die bläd sinn hawwe se wieder gezeigt. Die hawwe dem Veranstalter äh riese Kostereschnung präsentiert. Fär Absperrunge un des gonze Zeig un do hawwe die Monnemer gedenkt,  die Spinne do driwwe, un do mache mas hald nur bei uns hiwwe.

Die Lumpehafener hawwe donn die beleidigte Leberwurscht rausghängt. So sinn se die Pälzer. Immer versuche die onnere iwwer de Tisch ziehe wolle und donn schmolle, wenn die onnere do ned midmache.

 

Euer Heuner.