Die ledschde Woche war mas mulmisch. Irgendwie is es ned vorwärts gonge un so hawwe die Zweifel ogfange an mir zu nage. Un wie!
Heuner schaffscht du des? Hoscht des Maul ah ned zu voll genumme?
Donn haw ich ma ähn Ruck gewäh un moi gonzi power in die Longe Läuf gelegt.
Un heid 16 km. Des war ok, un wenn isch jedzt so uff moim sofa sitz un mir dun die Knoche weh, glab isch jedzd doch, wenn isch des tembo halde kann, kumm isch ah mid ähm Läschle durchs Brandeburger Dor.
Des muss isch eisch awwer noch verzehle. Am Stammdisch sinn se jedzd todal durschgedreht.
„Heuner du bischt unser Zugpferd“, un donn „ Mir hawwe des Rescht disch ah laafe zu sehe.“ Oder: „ „Mir sinn deu Fangroup, doi Supporter un mir wärre disch aofeuern, des hot die Weld noch net gsehe.“
Sie wolle ah Plakade mole un hawwe sisch iwwerlegt was do druff stehe kennt. Die hawwe on dem Obend schunn ähns zuviel kabt. Die hawwe Dinger rauskaue, do is ma schun de Schweis ausgebroche alläh bei dem Gedonge, wenn die des tatsächlisch mache dede.
„Nems olympisch: Dabei sein ist alles“,
„Quäl Dich Du Sau!“
„Überhol doch du Angeber“
„Zum Stammtisch hier rechts abbiegen“ un
„So schnell wie de Heuner, is in Sondhoffe keuner“
Donn hawwe se de Hammer an dem owend rauskaue, um mir klar zu mache das se des ernscht nemme mit moiner Läuferkarriäre.
Wohlgemerkt mit moiner, weil die kumme schun aus de Puschte wenn se uffs Klo misse.
„Heuner mir hawwe disch beim Stroßelauf in Sondhoffe ogemeld.
Stardgeld is schunn bezahlt. Des wärd ah Gaudi, wies seit dem Blumepeder känie mer in Monnem gewwe hod.
Wer ausdeilt, muss ah eustecke kenne.
Awwer das der Blumepeder widder mol hod herhalde misse, hod misch doch schun gfuchst.
Isch hab don in misch noi gschmunzeld und gedengt: steht ihr na dort mid eire blede Plakade.
Do kennt er stehe bis er schwarz werd……
Do bin isch nämlisch in Bärlin boim Halbmarathon……
Eier Marathon-Heuner