Die Fabienne hot am Streggerekord gekradzd un
isch bin de letschde Kilomeder fascht abgegradzd.
Damid dass glei wisst, des war moin erschte offizielle
Lauf un isch werd eisch ned uff die Nas binne wie long isch fär die verflixte 5 Kilomeder gebraucht hab.
De Ring in Hogge um 8.00 uhr morgens beängschtigend und atemberaubend. Äh Kulisse wie isch se noch nie gfield un gsehe hab.
Isch hab do a paar Fodos gemachd un guckt äfach selbscht was des fer Dimensionä sin.
Isch hab escht ähn Hals uff all die Schlaumaier:
– Heuner gehs longsam ah.
– Heuner blos ned iwwerpase.
Un donn labert misch noch ähner korz vorm Stard funn de Seit oh:
„Wollen sie Heute auch ihre persönliche Bestzeit verbessern??“
Uff seum Triko stand was vun Reutlinge. Her was macht ähn Sauschwob am Feierdag do in Hoggene?
Hätt isch dem Späzzle sage solle, dass isch iwwerhaupt kä persönlische Beschtzeit hab?
Nä, nie un nimmer, also hab isch süffisant geläschelt un ihm moin Daume hoch gezeigt.
Gottseidank kam jedzd de Stardschuss, bevor der noch was sage kond.
De Schwob is ab wie ä raket. Un isch alter Simbel hab versuchd an dem dro zu bleiwe. Isch bin gewetzd so guds halt ging. Awwer der Maultaschelutscher is halt in ähner onnere Liga gelofe.
Moin Blidsstard hod ma pfeiffende Lunge gebrocht un isch hab donn, um in de Formal 1 zu bleiwe, ähn Gang runnergschalte, eigentlisch 2, … un dann noch ähner.
Heuner, laaf doi tembo, hab isch ma immer zu mir selwer gsacht. Awwer des is sauschwer wenn disch alle iwwerhole un ma immer versuchd am
Iwwerholende dro zu bleiwe.
Bei km 4 war moi Bern so rot wie moi Triko, un des war knallrod.
Jedz hab isch mer blos noch gsacht, Heuner durschhalde.
Awwer isch bin, wie ma so sacht durschgereischt worre…..
Vunn dem ganze Ring hab isch nix me gsehe un isch war heilfroh als isch donn endlisch dursch des Ziel hab lafe kenne.
Isch hab misch donn schnell umgedreht un gsehe, dass do noch äh paar onnere hinner mir ware.
God sei donk ned ledschter!!
Die Fabienne Amrhein hab isch fodografiert, awwer die is ned ganz scharf worre, weil die so schnell gerennd is.
Iwwerhaupt war des gonz arg sponnend weil mir alle gejolt un des Mädel ogfeuert hawwe, un die Daume hamma gedrigt, das se den Streggerekord knackt.
Am Schluss hawwe äh paar läpische Sekunde gfehlt.
Donn wolld isch was warmes esse, awwer es hod nur Bockworscht im Brödsche gewe. Des war ähn totaler Roifall, isch hab midm Schteak gerechelt un donn so was.
Isch bin dann an die Kuchebar, die war galaktisch, un hab dort grausam zugschlage.
Eier Marathon-Heuner