Gebt uns Alten mehr Zeit!

De Marathon-Heuner – Gäbt uns Alde doch mehr Zeid!!!

 

Zielzeit-Richtzeit-Ende der Zeitmessung- Höchstzeit- Besenwagen.

 

Wänn isch des schunn in ähnere Ausschreiwung les, krieg isch die Krise
un hab schunn kä Luscht mehr.

Wenn isch ohn ähm „Volkslauf“ mitmache will sinn derardische Fisemadende Gift fär alde Läufer.
Wenn die Zeitmessung bei ähm HM noch 2:30 Stunde Feierobend macht,
fiell isch misch ausgschlosse.
Brauchscht ähfach mol ähn schlechde Dag erwischd hawwe, kummscht ans Ziel un käner iss mehr do.

Do fielht ma sisch doch verarscht, oder? Gonz dofun abgsehe, dass des Stardgeld donn sinnlos verprasst hoscht.

 

Jo, isch kenn jo all die Argumende:
zu wenig Helfer, Auflagen der Verwaltung, Straßensperrungen etc.

Gonz spunersch die Audofahrer, die drehe jo am Rad und donn dursch, wenn se wege ähner Schportverohstaldung mol ähn kläne Umweg fahre misse.

 

Wenn eisch die Verohstaldung wege dem gonze drumherum  zu viel iss,
donn lossts halt bleiwe !!
Un herd uff zu jammere, wenn die Teilnehmerzahle abrutsche un alle nur
noch zu de „Events“ wolle.

 

Ja genau, ah wenn ma iwwer 60 iss machts halt super Schpass in Bärlin zu laafe.
Zuschauergejohle ohne Ende un käner der dir mid soim Fahrrad in die Hacke fährt un dir droht disch ausem Renne zu nemme.

Also wunnert eisch ned wenn ah mir Alde die Partystimmung in Berlin, Frankfurt oder Hamburg wolle, denn die „Einsamkeit des Langstreckenläufers“ hawwe ma Dehäm beim Drähning oft genug.

Bsunnersch ärgerlisch sind die Renne, bei denne gar kä Stroße gschperrt wärre misse, weil alles im Wald odder im Feld long gehd un doch äh Zeitlimid vorgewwe iss.

 

Nee Leid mir alde wolle Schpass beim Laafe und solsche Schpassbremse
wärre vun mir glei aussordiert.
Des kennt ihr eisch jedzd mol merke.

 

Eier Marathon-Heuner