Dä Ofong
Isch bin de Heuner aus Sondhoffe ( der Heinrich aus Sandhofen ).
Isch binn noch immer gebläddelt vun mier selbscht.
Denn isch hab misch uff de HM in Berlin oahgemeld.Starg! Oddar?
Awwer ähns nochm onnerä.
Isch bin moei gonzes lewe mid moim Rad gfahre. Summers wie winders, Tach un Nachd.
Als isch donn in Rende war, hab isch äfach kähn bock mer druff kabt. De Drahdesel im Hof un de onner Esel,also isch, uffm cannapä.
Ums korz zu machä, isch bin faul un fed worre.
Isch wold friär schunn immer mol mitm Rad des Neggarthal nunnerfahre.
De Neggar mündet jo bei uns in de roi. Des wes ned jäder. Ähn polidigär hod des gonze mol noch heidelbersch verlegd. Hawwe mir uns schepp gelachd.
Also isch wold immer wisse wohär dä neggar kummt, un habs immer uffs aldedeil verschowe.
Un do hab isch null bock mer kabt. Schlimmer, isch hab des sch… Rad nimmer seäh känne.
Donn bin isch zufällisch mit moim Audo in den dämmermarathon gerade. Nix mer forwärds un nix mer rickwärds. Do bin isch hald ausgstigge un hab zugegugt.
Her des glabscht ned, was do fär Typpe und Gstalte mitgeloffe sin. Ach welsche mit ähm mortz Bierbauch.
Irgändie hod sisch des in moiner Bern feschtgsetzt,un donn is es so aus mir rausgebroche:
Des konn isch ah!
Isch hab dann middem jogge ogfange. Jo, des war Meer gehe als jogge. Aweer des is ä onnerie, longi Gschicht, die verzehl isch eisch annersmohl.
Im summer war isch donn bei so ähner joggingkomödie unn bin mit eierm peder, den känn isch von frieher, ins gspräch kumme.
Achdung uffpasse, jedzd kummds:
Im Fernseh war isch beim Berlihn-marathohn, do wo der Kenianer auss afrika den neie Weldrekord uffgstellt hod.
Un als der do so logger flogger ins Ziel eugeloffe is, iss mass widder so rausgerutscht:
„Des konn isch ah !“.
Nadierlich kän gonze, un a kän Weldrekord isch bin jo ned bled. Isch wolld ned nur de neggar nunner, isch wolld a mol nach Berlien, also hab isch mich fer den HM in Berliehn ogemeldt.
Jezat gibt’s kä zurick mehr.
Ä bissle erschrogge bin isch schunn als isch misch ogemeldt hab. Ähn Heiermonn, also 50 €.
Awwer egal, was soll der geiz.
Dofier guk isch bei de ongela vorbei, wenn se do noch konzlerin iss.
Donn hab isch mir gedenkt des wär doch was fär
des laf-alder-laf. So ähn alder knoche wie isch laft mid 65 des ersschte mol in seum lewe ähn HM.
Eiern Peder hot gemänd, des sei äh suber idee, un isch kennt doch vun moim träning un was ma so dabei alles durch de kopp geht schreiwe.
Isch so: peder du wescht, schreiwe war noch nie moi stärge, er: kä Probläm, schreib äfach alles so wie dir de schnawwel gewachse is.
Allah gud! Des hab isch jedzd mol ogfange.
De Marathon-Heuner
